Atentat ndaj kryeministrit turk Recep Tajip Erdogan

Organizata terroriste turke “Ergenkon”, e cila ende nuk është deshifruar nga autoritetet e sigurisë turke, është zbuluar në çastet e fundit lidhur me një plan që kishte për qëllim vrasjen e kryeministrit turk, Rexhep Tajip Erdogan. Grupi “Ergenkon” kishin planifikuar t’i bënte atentat kryeministrit Erdogan gjatë një vizite në Rejnhalli, mirëpo plani i menduar nga 15 persona, ka dështuar në momentet e fundit.

 Pas shpërthimi në provincën Hatay, kryeministri turk i shoqëruar nga ministri i Drejtësisë, Sadullah Ergin, kishte vizituar Rejhallin që t’i shprehte ngushëllimet për të vdekurit. Mirëpo, menjëherë pas kësaj vizite në sipërfaqe dolën pretendimet për atentat ndaj Erdoganit. Një prej pjesëtarëve të ekipit terrorist, me pseudonimin “Lodos” ka rrëfyer se edhe ai kishte qenë pjesë e planit të përbërë nga 15 persona që po i përgatisnin atentat kryeministrit turk, njoftojnë mediat turke, transmeton portali Almakos. Sipas “Lodos”, kanë qenë mosmarrëveshjet midis pjesëtarëve të ekipit ato që pamundësuan realizimin e planit për vrasjen e Erdoganit. Mirëpo, dëshmitari ka deklaruar se ekipi i tij është ende aktiv dhe pret momentin e volitshëm për ta realizuar qëllimin. 

Edhe në muajin maj të vitit 2011 në momentet e fundit ishte penguar një atentat ndaj kryeministrit të Turqisë, Rexhep Tajip Erdogan. Aso kohe, Erdogan, ishte duke shkuar në mitingun e qytetit Trabzon, kur konvoji elektoral në qytezën Hopa, u sulmua nga persona që më pas u zbuluan nga shërbimet turke. Me këtë rast, një nga pjesëtarët e sigurisë së kryeministrit ra nga autobusi dhe përfundoi nën autobus. 

Shaka e tepruar ndaj kryeministrit te Anglise

Kryeministri britanik, David Cameron ishte viktimë e një shakaje aspak të pakëndëshme për të. 

Gjatë fotografisë së kortezisë me lojtarët e regbisë të Britanisë së Madhe, Manu Tuilagi, lojtar i kombëtares angleze, pa u menduar dy herë bën “veshët e lepurit” pas shpinës së Cameron.

E sigurisht, mes dhjetra aparatëve që po dokumentonin ngjarjen, ky moment nuk kishte se si të shpëtonte.



Pas publikimit të fotos, vetë lojtari i regbisë ka kërkuar ndjesë në Twitter: “Qëllimi im nuk ishte për të ofenduar askënd. Megjithatë kërkoj ndjesë për gjestin e pamatur që bëra”, shkruajti ai.

Basha: Rama, premtime të humbura

Kryetari i PD, Lulzim Basha ka mbledhur paraditen e së shtunës grupin parlamentar, në qendër të të cilit ka qenë qëndrimi ndaj programit qeverisës të Partisë Socialiste. 

Në fjalën e tij Basha fillimisht ka deklaruar se opozita nuk do të bëhet pengesë për proceset integruese të vendit, sikurse u bë parardhësja e saj në këtë pozicion.

“Ne garantojmë se nuk do të bëhemi pengesë për integrimin. Ne do të japim konsensus për çdo reformë që do na çojë drejt Bashkimit Evropian”, ka deklaruar Basha.

Ai ka sfiduar kryeministrin e ri Edi Rama që të matet me arritjet që qeveria e mëparshme ka shënuar sipas tij gjatë tetë viteve të fundit.

“Para dy ditësh Rama bëri sulme përçarëse. Qeveria e Ramës le të matet me arritjet tona. Të na kalojë nëse mundet, ne nuk jemi xhelozë”, ka thënë Basha.

Më tej, kryetari i ri i Partisë Demokratike ka shprehur skepticizmin e tij për programin qeverisës të Partisë Socialiste, duke vlerësuar se mashtrimet do të dalin shumë shpejt në sipërfaqe.

“Sindroma e vitit 0 do të sjellë varfëri dhe papunësi. Premtimet e bujshme të Ramës kanë humbur. Shëndetësi falas nuk do të ketë dhe as 300 mijë vende të reja pune. Mashtrimet i kemi paralajmëruar që në fushatë”, ka shtuar Basha.

Debate ne Kuvend ne lidhje me programin e ri qeverises

Po zhvillohet në Kuvendin e ri, seanca maratonë ku debatohet programi qeverisës i kabinetit të kryesuar nga Edi Rama. 

Secili nga deputetet ka në dizpozicion 20 minuta kohë për të diskutuar rreth programit qeverisës.

Gjatë kësaj seance u zhvillua edhe votimi për zgjedhjen e nënkryetarit të Kuvendit. Edmond Spaho, deputet i PD-së u zgjodh me 99 vota pro në këtë detyrë.

Ka qenë pikërisht Spaho, ai që ka hapur edhe siparin e debatit të deputetëve sa i takon programit, ndërkohë që lista e diskutantëve është e gjatë.

Ministrat prezantojnë programet

Fillimisht disa prej ministrave kanë prezantuar programin personalisht dhe iu janë përgjigjur pyetjeve të deputetëve të opozitës.

I pari që u është përgjigjur pyetjeve të deputetëve ka qenë ministri i Shëndetësisë, Ilir Beqja, i cili ka prezantuar politikat e dikasterit të tij për këtë sektor.

“Brenda 100 ditëve territoret spitalore ambulatore t’i çlirojmë nga aktivitetet private. Qëllimi ynë është që shërbimi shëndetësor shtetëror të jetë paguesi i vetëm”, ka deklaruar Beqja. Më pas kanë vijuar ministrat e tjerë, secili me detajet përkatëse.

Edmond Haxhinasto, ministër i Transporteve dhe Infrastrukturës: Do realizojmë të gjitha projektet në infrastrukturë. Prioritet do të jenë investimet për zhvillimin e zonave turistike në jug. Në këtë zonë ka hapësira edhe për një transport ajror.

Edmond Panariti, ministër i Bujqësisë: Politikat e bujqësisë do të jenë të orientuara për zhvillimin e tregut të brendshëm, në mënyrë që puna e fermerëve të mos shkojë kot. Zona e Myzeqesë është hambari i Shqipërisë, ku kemi prodhimin më intensiv bujqësor dhe subvencionet nuk do të mungojnë. Ato gjitashtu do të orientohen sipas rezultatit. Cështja e përmbytjeve është një problem kronik dhe investimet për kanalizimet do të jenë prioritet i ministrisë.

Shkëlqim Cani, ministër i Financave: Instituti i Sigurimeve Shoqërore është i dorës së dytë. Ne do gjejmë një zgjidhje që qytetarët të mos rrënohen. Janë me dhjetëra miliardë lekë detyrime të prapambetura të lëna nga qeveria e ikur. Situata e buxhetit të shtetit është e rëndë, por jo e pashpresë. Me Bankën Botërore dhe FMN-në do bëjmë një skanim të borxheve dhe do punohet që të vendosen kritere dhe kushte për shlyerjen e këtyre detyrimeve.

Damian Gjiknuri, ministër i Energjitikës: Procesi i privatizimeve rezultoi i dështuar dhe qeveria do t’i kushtojë vëmendje të gjitha pasojave që kanë ardhur nga ky dështim. Angazhohem për kontrollin e procesit të privatizimit të kompanisë “Albpetrol”, që rezultoi gjithashtu i dështuar. Në programin e PS është bërë i qartë edhe adresimi i problemeve të minatorëve, për të gjetur për ta zgjidhjen e duhur për pensionet dhe kontributet shëndetësore.

Eglantina Gjermeni, ministre e Turizmit dhe Zhvillimit Urban: Qeveria do të vendosë një moratorium për ndalimin e ndërtimeve pa leje në Berat dhe Krujë, për mbrojtjen dhe promovimin e trashëgimisë kulturore. Gjithashtu do të realizojmë fushata turistike brenda dhe jashtë vendit për të nxitur turistët e huaj. Të promovojmë vlerat tradicionale të Beratit duke rritur cilësinë e shërbimit aty. 

NSA i jep informacionet sekrete Izraelit

Agjencia Kombëtare e Sigurisë (NSA) shkëmben vazhdimisht të dhëna sekrete të papërpunuara me Izraelin, pa kryer fillimisht kërkime për të hequr informacione rreth qytetarëve amerikanë, zbulon një dokument sekret i publikuar nga “The Guardian”, që e ka marrë atë nga spiuni Edward Snowden. 

Detajet e marrëveshjes së shkëmbimit të informacioneve sekrete janë paraqitur në një memorandum mirëkuptimi mes NSA-së dhe homologëve të tyre izraelitë, që tregojnë se qeveria amerikane dorëzon komunikimet e përgjuara, ku me shumë gjasa përfshihen edhe telefonatat e email-et e qytetarëve amerikanë. Marrëveshja nuk vendos kufinj ligjorë detyrues, për përdorimin e të dhënave nga izraelitët.

Zbulimi se NSA ka rënë dakord për të shkëmbyer të dhëna sekrete të papërpunuara me një vend të huaj, bie në kundërshtim me siguritë e dhëna nga administrata e Obamës, se ekzistojnë masa mbrojtëse të ashpra për të mbrojtur privatësinë e shtetasve amerikanë të përfshirë nga përgjimet.

Komuniteti i inteligjencës e quan këtë proces “minimizim”, por memorandumi e bën të qartë se informacioni i shkëmbyer me izraelitët ndodhet në një gjendje të pa-minimizuar.

Marrëveshja u arrit në parim në mars të vitit 2009, sipas memorandumit pa datë, që parashtron rregullat bazë për shkëmbimin e inteligjencës.

Memorandumi prej 5 faqesh, cilëson një marrëveshje mes agjencive të SHBA-ve dhe Izraelit “që ka të bëjë me mbrojtjen e shtetasve amerikanë”, duke theksuar vazhdimisht të drejtat kushtetuese të amerikanëve për privatësi dhe nevojën e stafit të inteligjencës izraelite për të respektuar këto të drejta.

Putin: Sulmet në Siri do të nxisnin terrorizmin

Ndërkohë që Obama pushon përkohësisht, Putin del në qendër të vëmendjes, duke dashur t’i thotë diçka amerikanëve në lidhje me Sirinë, me anë të asaj që ai e quan “një lutje për të pasur kujdes”. 

Duke shfrytëzuar faqen e opinioneve në “New York Times”,  “për të folur drejtpërdrejt me popullin amerikan dhe liderët e tyre politik, në një moment komunikimi të pamjaftueshëm mes shoqërive tona”, presidenti rus Vladimir Putin ka paralajmëruar për përkeqësim të situatës në Lindjen e Mesme dhe në botë, nëse vendet do të anashkalojnë Kombet e Bashkuara dhe do të ndërmarrin veprime ushtarake.

“Sulmi potencial i SHBA-ve ndaj Sirisë do të rezultojë në rritjen e numrit të viktimave të pafajshëm dhe përshkallëzim të tensionit, duke e përhapur potencialisht konfliktin përtej kufijve të Sirisë”, shkroi Putin në editorialin e tij, që u shfaq mbrëmjen e së mërkurës online. “Sulmi do të shtonte dhunën dhe do të nxiste një valë të re terrorizmi”.

“Çdo veprim ushtarak do të minonte përpjekjet e gjithanshme për të zgjidhur problemin bërthamor të Iranit dhe konfliktin izraelito-palestinez, si dhe do të destabilizonte më shumë Lindjen e Mesme dhe Afrikën e Veriut. Ai mund të hidhte poshtë të gjithë sistemin e ligjeve ndërkombëtare dhe të çonte në një zhbalancim total”.

Duke e quajtur luftën civile si një “konflikt të brendshëm, i nxitur nga armët e të huajve të dhëna ndaj rebelëve opozitarë”, Putin paralajmëroi të mos mbahej ana e opozitës në Siri, që sipas tij “përfshin, më shumë se mjaftueshëm, luftëtarë të al-Qaeda-s dhe ekstremistë të çdo lloji”.

Megjithatë, ai nuk përmend fare faktin që Rusia furnizon prej kohësh me armë qeverinë siriane. Lideri i Rusisë tha se “nuk del në mbrojtje të qeverisë siriane”, por kërkon të favorizojë “një plan kompromisi”. Veprimet ushtarake kundër qeverisë siriane, pa miratimin e Këshillit të Sigurisë në OKB, “janë të papranueshme bazuar mbi statutin e Kombeve të Bashkuara dhe do të konsituonte një akt agresioni”, sipas Putin.

Duke kontestuar pohimet e Obamës dhe të tjerëve, Putin tha se “ekziston çdo arsye e mundshme të besohet se armët kimike nuk janë përdorur nga ushtria siriane, por nga forcat opozitare për të provokuar ndërhyrjen nga padronët e tyre të huaj e të fuqishëm, që do të viheshin në krah të fundamentalistëve”.

Përdorimi i forcës ushtarake ka “rezultuar joefektive dhe e pavlerë” në vende si Afganistani, Libia dhe Iraku, deklaron presidenti rus në opinionin e tij. Ai hamendëson se vdekjet mes civilëve në Siri, nëse do të ketë sulme ajrore, do të jenë “të paevitueshme”.

Putin përfundon opinionin e tij duke thënë se ai dhe Obama ndajnë “një besim në rritje”. E megjithatë, ai sfidoi gjithashtu çështjen e Obamës për mbinatyrshmërinë e amerikanëve në fjalimin e tij të mbrëmjes së të martës, duke thënë se “është jashtëzakonisht e rrezikshme të inkurajosh njerëzit të shohin vetveten si të jashtëzakonshëm, për çfarëdo lloj motivi”.

“Ne jemi të gjithë të ndryshëm, - përfundoi Putin, - por, kur ne lutemi për bekimin e Zotit, ne nuk duhet të harrojmë se Zoti ka krijoi të gjithëve të barabartë”
.

Iniciativa e Engel në Kongresin amerikan

Anëtari i Kongresit amerikan, Eliot Engel paraqiti në Dhomën e Përfaqësuesve një deklaratë për të nderuar Azem Hajdarin, udhëheqësin e lëvizjes për demokraci në Shqipëri në 15-vjetorin e vrasjes. 

“Përmes fjalëve dhe veprave, Azem Hajdari tregoi se liria nuk dhurohet, por fitohet me përpjekje, vendosmëri dhe besim”, thuhet në deklaratë.

Azem Hajdari, i cili u vu në krye të lëvizjes studentore që përshpejtoi rënien e komunizmit në Shqipëri, u vra më 12 shtator 1998. Ai kishte mundur t'i mbijetonte një atentati të mëparshëm në vitin 1997 brenda Parlamentit shqiptar, ku mori plagë të rënda.

Gjatë konfliktit në Kosovë, thuhet në deklaratën e kongresmenit Engel, Azemi mbështeti gjithashtu lëvizjen e Kosovës për liri e pavarësi, duke i kushtuar asaj kohë dhe energji.

Në deklaratën e tij, Eliot Engel, anëtar i Dhomës së Përfaquesve dhe numri i dy i komisionit për marrëdhëniet me jashtë të kësaj Dhome, thotë se Azem Hajdari ishte një mbrojtës i fuqishëm i vlerave demokratike dhe hero për shumë shqiptarë.

Zoti Engel u kërkon kolegëve të tij, anëtarë të Dhomës së Përfaqësuesve, të përkujtojnë Azem Hajdarin për kontributin historik në ndërtimin e demokracisë në Shqipëri.

Më 12 shtator, shqiptarë nga i gjithë vendi, nga Kosova dhe vende të tjera do të mblidhen për ceremoninë e rivarrimit të Azem Hajdarit, i cili do të prehet në varrezat e dëshmorëve në Tiranë.

Rusia paralajmeron rrezikun e rrembimit nga SHBA te shtetasve ne bote

Godina e ministrise se jashtme ruse ne Moske!

Ministria e Jashtme e Rusisë paralajmëroi të gjithë shtetasit për rrezikun që i kanoset nëse vizitojnë vende që kanë marrëveshje ekstradimi me Shtetet e Bashkuara të Amerikës. 

Në deklaratën e saj, Moska paralajmëronte se vizita në këto vende mund të të bëjë të përfundosh në një burg amerikan, nëse Uashingtoni do të nxjerrë një mandat arresti, të justifikuar apo jo.

Në paralajmërimin e publikuar ditën e martë, ministria denonconte faktin se "disa shtetas rusë janë rrëmbyer dhe dërguar në SHBA, pa iu garantuar e drejta e një gjyqi të lirë dhe transparent".

Marrëdhëniet midis SHBA-së dhe Rusisë kanë degraduar në nivelin më të ulët në shumë vjet, pas qëndrimit të vendosur që po mban presidenti Putin në mbështetje të regjimit të al-Assad në Siri dhe pas akordimit të strehimit politik për Edward Snowden, ish-punonjësit të CIA-s të kërkuar në vendin e tij për spiunazh.

Deklarata, e cila nuk i referohej çështjes Snoëden në asnjë moment, mbështeste arsyetimin e saj në "verdiktet e pajustifikuara" nga ana e Viktor Bout dhe Konstantin Yaroshenkos, të dy të burgosur pasi u ekstraduan në SHBA.

Bout u dënua me 25 vjet heqje lirie në prill 2012, pasi u shpall fajtor për akuzën e "komplotit për vrasjen e zyrtarëve dhe shtetasve amerikanë", si pjestar i një rrjeti të supozuar të trafikimit të armëve.

Ai u ekstradua në SHBA prej Tajlandës.

Nga ana e tij, Yaroshenko, një pilot i avionëve të mallrave, u arrestua në Liberi mbi bazën e një mandati të kërkimit ndërkombëtar.

I ekstraduar në SHBA në vitin 2011, ai u dënua me 20 vjet heqje lirie për trafik ndërkombëtar droge. 

Foto qe vendos SHBA me "shpatulla pas murit"

Ndërsa Shtetet e Bashkuara të Amerikës janë duke përgatitur një sulm të mundshëm mbi Sirinë, ekziston një imazh të cilin administrata e Obamës nuk do të dëshironte që të publikohej kurrë. 

Sekretari Amerikan i Shtetit, John Kerry, i cili ka krahasuar Bashar al-Assadin me Hitlerin dhe Saddam Hussein në një fjalim të gjatë gjatë së dielës, shfaqet në këtë foto duke darkuar me presidentin e Sirisë, në vitin 2009.

Assad dhe Kerry, në atë kohë një ish-kandidat për president i SHBA-së dhe një prej senatorëve me më shumë ndikim në Senat, duken tepër të përfshirë në bisedë, ndërsa gratë e tyre i qëndrojnë nga pranë.

Një kamarier me veshje popullore siriane i qëndron pranë, ndërsa Kerry dhe Assad shijojnë darkën, e cila nuk mund të konsiderohet si një pritje diplomatike, por një kortezi personale e Presidentit të Sirisë.

Për ironi të fatit, pas atij takimi, Kerry deklaroi në mediat amerikane se ishte takuar me “partnerin” al-Assad, me qëllim që të diskutonte mbi mbarëvajtjen e procesit të paqes në Lindjen e Mesme.

Imazhet e këtij takimi, u publikuan të hënën nga “Daily Mail” dhe disa rrjete të tjera mediatike botërore.

Assad: Obama dhe Hollande, të paaftë

“Kemi sfiduar Shtetet e Bashkuara dhe Francën që të nxjerrin qoftë edhe një provë të vetme. Por Obama dhe Hollande kanë qenë të paaftë, edhe përpara popujve të tyre”. 

Kështu ka deklaruar presidenti sirian Bashar al Assad, duke folur ekskluzivisht për të përditshmen franceze “Le Figaro”, në lidhje me akuzat për sulm me armë kimike të bëra ndaj regjimit të tij.

“Lindja e Mesme është kthyer në pluhur dhe nëse do të ketë bombardime ndaj Sirisë, atëherë ekziston rreziku për një luftë rajonale”, ka vijuar më tej Assad.

Ai ka theksuar se nuk mjafton të flitet vetëm për përgjigjen siriane, por edhe për atë që mund të ndodhë pas bombardimit të parë nga ana e Perëndimit. 

“Për momentin, askush s’e di se çfarë do të ndodhë. Të gjithë do të humbin kontrollin e situatës kur pluhuri të ngrihet. Kaosi dhe ekstremizmi do të përhapen. Pra, ekziston rreziku i një lufte rajonale”, ka nënvizuar Assad.

“Kushdo që operon kundër interesave të Sirisë dhe qytetarëve të saj është një armik”, ka qenë një tjetër mesazh i presidentit sirian gjatë intervistës.

“Populli francez nuk është armiku ynë, por politika e ndjekur nga shteti i tyre është armiqësore kundrejt popullit sirian. Në këtë situatë, shteti francez do të jetë një armik”, ka thënë Assad.

Sipas tij, “kjo armiqësi do të marrë fund kur shteti francez të ndryshojë politikë. Do të ketë reaksione, natyrisht negative, ndaj interesave të Francës”.

Akuzat e shteteve të Perëndimit ndaj Damaskut se ka kryer një sulm me armë kimike ndaj popullsisë siriane Assad i cilëson si “jo logjike”.

“Supozojmë se ushtria jonë do të përdorë armë të shkatërrimit në masë, a është logjike që ta bëjë këtë në një zonë ku ndodhet vetë ajo dhe ku ushtarët janë plagosur nga armë të tilla, sikurse thanë inspektorët e OKB-së që vizituan spitalin ku janë shtruar? Ku është logjika këtu?”, ka shtuar Assad
.

Obama kerkese ne kongres per sulmet ne Siri

Udhëheqësit amerikanë mirëpritën vendimin e papritur të presidentit për të kërkuar votën e dy Dhomave të Kongresit, për një sulm të mundshëm kundër Sirisë. 

Mbi 140 ligjvënës amerikanë i kishin shkruar një letër Barak Obamës, përmes së cilës i kërkonin të merrte miratimin nga Kongresi, përpara se të ndërmerreshin hapat kundër Sirisë.

Kongresi është me pushimet e sezonit dhe ligjvënësit amerikanë janë shpërndarë në shtete të ndryshme.

Përmes një deklarate, udhëheqësit republikanë në Dhomën e Përfaqësuesve thanë se “në bazë të Kushtetutës, përgjegjësia për të shpallur luftë i takon Kongresit”.

Kreu i Dhomës, Xhon Bejnër, dhe ekipi i tij thanë se shqyrtimi do të bëhet javën e 9 shtatorit, për t’i dhënë kohë presidentit amerikan të paraqesë arsyetimin për vendimin e tij, para Kongresit dhe popullit amerikan.

Analisti politik Lerri Sabato tha për “Zëri i Amerikës” se Obama ndryshoi mendje papritur. Sipas tij, “Shefi i Shtëpisë së Bardhë do të ketë shumë punë përpara për të bindur Kongresin, sepse nuk ka një shumicë që e mbështet projektin e një sulmi në Siri”.

SHBA, protesta kundër luftës

Grupe protestuesish u mblodhën në të gjithë Shtetet e Bashkuara për të protestuar kundër propozimit të Presidentit Barack Obama për të ndërmarrë një sulm kundër Sirisë.

Protestuesit i bënë thirrje administratës që të presë raportimin e vëzhguesve të Kombeve të Bashkuara që u kthyen nga Siria të shtunën me provat që mund të përcaktojnë nëse forcat qeveritare përdoren armë kimike.

Në “Times Squate” të Nju Jorkut, grupet mbanin slloganet ku shkrohej: “Larg duart nga Siria”. Në Filadelfia, protestuesit marshuan nga qendra eqytetit në “Independence Plaza”. Vanesa Meri, që iu bashkua atyre është e mendimit se “nuk ka prova të mjaftueshme për të ndërmarre sulme kundër Sirisë”.

Edhe në San Fracisko, protestuesit shprehen shqetesimin e tyre duke thene se jane kunder nje “lufte te re ne Lindjen e Mesme”.

Vëzhguesit e OKB-së në Siri kërkojnë 3 javë kohë

Organizata për Ndalimin e Armëve Kimike (ONAK) shpjegoi se “vlerësimi i plotë i provave të mbledhura nga inspektorët e OKB-së për sulmin me arme kimike në Siri- kërkon mbi 3 javë”.

Ekipi vëzhgues përbëhet nga bnëntë eksperte të kësaj organizate dhe tre te tjerë, perfaqesues nga Organizata Botërore e Shëndetesise.

Të shtunën në mbremjë ata mberritën në selinë qendrore në Hagë.  Permes nje deklarate, Organizata per Ndalimin e Armeve Kimike “Faktet e mbledhur nga ekipi i vëzhguesve duhet t’i nënshtrohen analizave laboratorike dhe teknike sipas procedurave dhe standarteve te përcaktuar dhe të njohura dhe për këto do të duhen mbi 3 javë”.

Opozita siriane, e pakënaqur me Obamën: “Pritja e Kongresit inkurajon trupat e Assadit” 
Pak pas përfundimit të fjalimit të presidentit amerikan Barak Obama, ushtria siriane nisi të godasë zonat e kontrolluara nga kryengritësit në Damask. Zëdhënësi i Koalicionit Kombëtar Sirian, Louay Safi, tha se ky vendim tregoi “dështim lidershipi” nga ana e SHBA-së dhe se “inkurajon forcat e presidentit Assad”.

Vendimi i presidentit amerikan Barak Obama për të pritur autorizimin e Kongresit para se të sulmojë Sirinë nuk ka kënaqur grupet opozitare siriane.

Siria mohon akuzat e SHBA-së se ka përdorur armë kimike më 21 gusht, ku sipas amerikanëve 1429 persona u vranë nga ushtria siriane me armë kimike. Tashmë Kongresi do të mblidhet më 9 shtator, që do të thotë se asnjë veprim ushtarak nuk do të ndërmerret deri atëherë nga forcat amerikane në Siri.

“Shtetet e Bashkuara duhet të ndërhyjnë ushtarakisht në Siri. Kam vendosur që ta ndërmarrin një aksion ushtarak kundër regjimit sirian dhe ta ndëshkojmë për përdorimin e një gazi që vrau mbi një mijë vetë, një atentat ky kundër dinjitetit njerëzor. Por pervecse Komandat i Forcave të Armatosura, jam edhe presidenti i demokracisë më të vjetër parlamentare. Edhe pse une mund ta jap urdhërin e sulmit pa dritën jeshile të Dhomës së Përfaqësuesve dhe Senatit, kam vendosur të dëgjoj mendimin e të përzgjedhurve të popullit amerikan, e për këtë do te nisë një diskutim në Kongres”, tha Obama.

“Cili është qëllimi i sistemit ndërkombëtar të rregullave që kemi ndërtuar nëse lejojmë një sulm kimik që vret fëmijë? Një sulm që dënohet nga 98 përqind e vendeve të botës? Duke i folur Kongresit dhe gjithë botës, dua të them që ajo cfarë është bërë me armët kimike nuk duhet të hetohet, por duhet të zgjidhet. Do t’u kërkoj të gjithëve që të jenë në krahun tonë. E di që lufta është shumë e rëndë, sidomos për ne që sapo kemi mbaruar një luftë në Irak dhe Afganistan, por ne nuk do çojmë trupat tanë për të hapur një luftë tjetër, por do të jemi në krah të popullit sirian”, deklaroi presidenti amerikan.

Izrael, ushtria furnizohet edhe me viagra

Mes 105 urdhrave të dhëna së fundi nga Ministria e Mbrojtjes së Izraelit ka gjithçka të mundshme: nga gomat, te dispozitivët për të ngrohur plagët, e deri te salcat pikante. 

Por, një element spikat mbi të gjithë, sa për kuriozitet, ai i furnizimit me Viagra.

Urdhri në fjalë ka të bëjë me 1200 ampula prej 100 mg citrati, përbërësi aktiv i Viagras, të destinuara për ushtarët që vuajnë nga mosfunksionimi i gjenitalit.

Kërkesa është firmosur nga divizioni mjekësor, kështu që tabletat nuk mund t’u atribuohen punonjësve të Ministrisë së Mbrojtjes, apo të plagosurve në rehabilitim, por të rezervuara pikërisht për trupën ushtarake në aktivitet.

Me sa duket, kjo nuk është hera e parë që ministri ka urdhëruar dhe shpërndarë Viagra për ushtarët. Në 2005, një artikull i shfaqur në të përditshmen hebraike “Mjekësia e Aviacionit dhe Hapësirës”, i publikuar nga qendra për kërkime e mjekësisë hapësinore, fliste për një ndalim ndaj pilotëve: nuk ka Viagra 8 orë para fluturimit, sepse mund të ndryshojë perceptimin e ngjyrave.

Ministri i Mbrojtjes preferon të mos komentojë për momentin, për shkaqe privatësie.

Kerry: Assad eshte kriminel

Shtetet e Bashkuara të Amerikës nuk preferojnë luftën, por diplomacinë. Pak orë pas tërheqjes së Britanisë nga koalicioni i vendeve që po përgatiten për një sulm të mundshëm ndaj Sirisë, sekretari amerikan i Shtetit, John Kerry i jep edhe një shans më shumë regjimit të Bashar al-Assad dhe mbi të gjitha superfuqive të tjera, për t’u ulur të gjithë në një tryezë bisedimesh mbi gjetjen e një zgjidhjeje për situatën në vendin e përçarë nga lufta civile. 

Në një deklaratë të drejtëpërdrejtë për shtyp, mbrëmjen e së premtes, sekretari Kerry ndau qartësisht fjalimin e tij në tre koncepte, në atë që SHBA di, në atë që duhet të bëjë dhe në atë që do të bëjë.

“E dimë që regjimi i Assad ka përdorur armë kimike dhe ka rezerva të mëdha të tjera të këtyre armëve. Regjimi i Assad ka përdodur këto armë kundër njerëzve të tij. E dimë që sulmi u paralajmërua dhe ushtarët e Assad morën masa mbrojtëse, duke vendosur maska kundragazi. Dimë se sulmi kimik ka qënë i qëllimshëm, dime se çfarë ka ndodhur dhe pamë viktimat me sytë tanë. Dimë horrorin dhe makabritetin e kësaj ngjarjeje. SHBA di se 1.429 persona kanë humbur jetën nga ky sulm kimik, përfshirë 426 fëmijë. Dimë edhe se Assad ishte i vendosur për të marrë nën kontroll periferinë e Damaskut me çdo mënyrë, dimë se madje edhe mjekë që u përpoqën të shpëtonin viktimat mbetën viktimë e këtij sulmi. I gjithë ky terror është vetëm vepër e qëllimshme e regjimit të Bashar al-Assad", nisi deklaratën e tij Kerry.

"Ne dimë edhe se çfarë bënë pas. Unë telefonova ministrin e Jashtem sirian, duke i kërkuar të mos fshihej, pasi nëse regjimi nuk kishte asgjë për të fshehur, nuk do të kishte asgjë edhe për të pasur frikë. Megjithatë, Siria është përpjekur të shkatërrojë provat gjatë këtyre ditëve. Aksesi që i është dhënë inspektorëve të OKB-së ishte jashtezakonisht i kufizuar. Të gjitha këto që dimë janë fakte. Pyetja tani është jo se çfarë dimë, por çfarë do të bëjmë".

Duke shpjeguar, për herë të parë në mënyrën më të qartë qëndrimin e shtetit amerikan, Kerry shtoi: "Eshtë e qartë që u shkel vija e kuqe, u shkelën konventat ndërkombëtare për mospërdorimin e armëve kimike, të firmosura nga pothuajse të gjithë vendet e botës, përfshi Iranin. Vendosmëria e Shteteve të Bashkuara kundër armëve kimike ka një rëndësi që kalon kufijtë e Sirisë. Kjo çështje ka rëndësi në Iran, Korenë e Veriut, Liban, kundër organizatave terroriste si Hezbollah, është një çështje me rëndësi për historinë dhe të gjithë planetin".

Megjithatë, pavarësisht të gjitha fakteve dhe tejkalimit të linjës së kuqe, Uashingtoni, në fjalën e Kerry-t, duket se ende nuk është i gatshëm të përkushtohet në një fushatë të re ushtarake.

"E dimë që amerikanët janë të lodhur nga lufta, por kjo nuk na çliron nga përgjegjësitë tona. Historia do të na gjykojë, e presidenti Obama do të marrë vendimin e duhur në kohën e duhur, pasi të kemi raportin e inspektorëve të OKB-së. Megjithatë, qëllimi kryesor është nje proces diplomatik që të zgjidhë këtë krizë. Lufta nuk është asnjëherë zgjidhja e parapëlqyer", përfundoi fjalimin e tij Kerry. 

Siria, Obama: konsiderojmë një aksion të kufizuar

Ndërkohë, pak momente pas këtij fjalimi, presidenti amerikan Barack Obama deklaroi se qeveria e Shteteve të Bashkuara nuk ka marrë ende një vendim për Sirinë.

Deklaratën e tij Obama e bëri gjatë një takimi në Shtëpinë e Bardhë, prej nga shprehu shqetësimin e tij për përdorimin e armëve kimike nga regjimi i Assad.

“Po konsiderojmë një aksion të kufizuar mbi Sirinë. Përdorimi i armëve kimike është një kërcënim për botën dhe Shtetet e Bashkuara”, ka deklaruar Obama.
 

Joe Biden: Assad do pergjigjet per te gjitha

Nënpresidenti amerikan Joe Biden deklaroi se nuk ka asnjë dyshim qe regjimi i Bashar al-Assad ka kryer sulmin e javës së kaluar me armë kimike në Damask dhe për këtë, duhet të vihet para përgjegjësisë. 

Komentet e numrit dy te Shtepise se Bardhe vijne ne kohen kur Presidenti Barack Obama vazhdon të shqyrtojë opsionet për një reagim ndaj kësaj situate me aleatët kryesorë. Në mes të përgatitjeve për sulme ushtarake në Siri, Biden e nisi fjalimin ne konventën kombëtare të Legjionit Amerikan në Teksas me fjalë të forta për qeverinë e Assad-it.